بصراحة كده ومتزعلش منى إنـت مـسـتـفـز....
أنا متغاظ منك قووووى ...ونفسى أضربك قلمين يمكن تفوق....
كل شويه تسمع برنامج للشيخ فلان وبرنامج للشيخ علان..و و و و و ...
وده يقولك أوعى تبص للبنات ...وإنت بينك وبين نفسك تقول (حرمت خلاص...)
والتانى يقولك....لازم تصلى فى جماعة....وانت تقول (حاضر مش هفوت ولا جماعة...)
والشيخ التالت يقولك...إبعد عن الغيبة والنميمة....وإنت تقول ( تبت ومش هرجع تانى )
وبعد شويه كأنك مسمعتش حاجة.... مع إنك من سطرين بس كنت بتقول أنا تبت ومش هرجع تانى....( والسطرين دول يمكن يكونوا ساعتين أو يومين...)
ـــ عينك مش بتترفع من على البنات....مع إنك قولت أنا حرمت خلاص...
ـــ بتدخل المسجد قليل ....مع إنك قولت مش هفوت ولا جماعة...
ـــ بتغتاب وبتنم ليل ونهار.....مع إنك قولت تبت ومش هرجع تانى....
مش عارف أيه اللى يمشى معاك ويأثر فيك....نفسى أعرف ليه مش عايز تكون محترم ؟؟؟
ناقص إن المشايخ ييجو لحد عندك ويبوسو على إيدك ( لو سمحت... من فضلك .. بعد إذنك... يا ريت تكون محترم....إحنا أسفين لو أزعجناك......)....
بذمتك...فعلك ده يرضى حد ؟؟؟
أوعى تقول ــ ( أنا مش عارف حاجة فى الدين )
كداااااااااااااااااااااااااااب......انت كداب وهتجننى معاك...
إنت تعرف فى الدين حاجات ناس كتير متعرفهاش...
عايز تقنعنى إنك مش عارف الأية دى ( قل للمؤمنين يغضوا من أبصارهم ويحفظوا فروجهم...)
عايز تفهمنى إنك مش عارف الحديث ده ( لأن يطعن فى رأس أحدكم بمخيط خير من أن يمس إمرأة لا تحل له )...
عايز تفهمنى إنك مش عارف أدلة من القرأن والسنة عن فضل الصلاة وعن عقوبة تاركها؟؟؟
وأكيد تعرف أدلة على حرمة الغيبة والنميمة ؟؟؟؟
يعنى من الأخر كده....إنت بتكدب على نفسك...
وفاكر إن لسه قدامك عمر طويل وبكره تتوب بجد....
يا خوفى ميجيش بكره عليك خالص....أو ييجى ويكون حالك أسوأ وأسوأ....
أنا زهقت منك ومن مماطلتك...ولازم تشوف حل للمصيبة اللى إنت فيها...
وإوعى تفتكر إن ربنا هيجاملك ويدخلك الجنة على البلاوى اللى انت بتعملها دى ؟؟؟
ربنا مش بيجامل يا حبيبى...........................
حاسس إن واحد الوقت من اللى بيقرأو الكلام ده هيقولى
ـــ يا عم حرام عليك...داخل فينا شمال ليه ؟؟؟....دا ربنا بيقول ( ادع الى سبيل ربك بالحكمة والموعظة الحسنة )..........
هرد عليه وأقوله...
ـــ معاك حق طبعا....بس أنا بعاتب نفسى يا أخى.....أنا بتكلم عن نفسى مش عن حد فيكم....أنا دخلت شمال فى نفسى مش فى حد فيكم.....
....( بس بينى وبينك كده....لو حد فيكم مستهتر بدينه زى كده...يبقى بردو مستفز...ومحتاج يضرب نفسه قلمين.....ويعرف إن ربنا مش بيجامل )
